Entroido Xinzo de Limia

Domingo Corredoiro

2012-02-06T13:51:00.001+01:00

Chega xa o grán día onde sairán por primeira vez as Pantallas, O Domingo Corredoiro. Deixámosvos este poema escrito por José Manuel Pérez Rodríguez (Sema) titulado "O Sentir da Pantalla"

Chega o intre soñado

despois dun ano esperando,

volver a sentir na pel

o traxe desexado.

A rúa está murmurando

o canto das vexigas,

e as túas campás bailando

coa alma enchida.

Comezas polo pantalón

e sentes a calor do liño na pel,

o tempo que pensas

que sería o traxe sen el.

Pos a camisa

agarimas os botóns,

oes as rúas que esperan,

canta o teu corazón.

Calzas os zapatos

para levala ben elegante,

que se aparten todos!

e no desfile a deixen diante.

E chega o intre da faixa

que suxeitas tan forte coma o sentir

da alma namorada da festa

que do corpo busca fuxir.

Descolgas a capa entón

e as cintas comezan a brincar,

séntela enriba túa

e pensas en voar.

Ollas para o espello

e xa a ves debuxada

non hai nada máis fermoso

que a marabillosa Pantalla.

Falan as campás do cinto

por ti están a chamar,

endexamais vas esquecer

o seu belo cantar.

Música que sempre acompaña

o doce danzar,

as cintas, un arco da vella

que enche de notas o ar.

Pos as polainas

o ritmo das campás incesantes,

ollas como contestan os cascabeis

igual, igual de elegantes.

E atas o pano,

non menos importante,

mentres miras a pantalla

que berra: avante!

Pois só falta ela, a xefa,

o máis destacado,

só con sentila na man

xa quedas encantado.

Si, e ela, a pantalla

a alma da festa,

o arraigo dun pobo

que no vestir se manifesta.

Comezas a bater as buxigas

cun xesto incesante,

mentres ves aos raparigos

de ollar rutilante.

Non, non están asustados.

Quedan namorados

igual que quedaches ti

a primeira vez

que a viches danzando…

Procesión e Colgamento do Meco

2012-01-26T12:24:00.001+01:00

O próximo día 4 de febreiro, e seguindo ca nosa teima do entroido máis tradicional, celebraremos a Procesión do Meco.

Vinde todos con vestimenta tradicional, roupa vella, rural, aperos de labranza, etc... Todo o demais pómolo nós (fachucos de palla, chocas, touro, meco, carro, mascaras, etc...

Sairemos dende o Museo Galego do Entroido a eso das... entre lusco e fusco. Ao final remataremos como sempre coa cea de confraternidade a cual estades todos convidados.

VEN E PARTICIPA NON DEIXES QUE SE ESQUEZA O NOSO ENTROIDO TRADICIONAL.

Por outra banda e xa que non existe en internet un lugar onde aparezan as datas oficiais do Entroido e incluso a páxina do concello de Xinzo de Limia segue en construcción...

Informamos dende o noso blog da asociación cultural a pantalla destas datas:

Sábado do Petardazo 28 de xaneiro

Domingo Fareleiro 29 de xaneiro

Colgamento do Meco 4 de febreiro

Domingo Oleiro 5 de febreiro

Noite das Mulleres 11 de febreiro

Domingo Corredoiro 12 de febreiro

Entroido 17, 18, 19, 20 e 21 de febreiro

Enterro da Sardiña 22 de febreiro

Domingo de Piñata 22 de febreiro

O cartel do Entroido 2012

2012-01-25T10:09:00.004+01:00

Xa se escolleu o cartel que representará ao Entroido de Xinzo de Limia neste ano 2012, parabens ao gañador do concurso José Manuel Formoso Gómez. O cartel destaca polo seus tonos ocres e o slogan "un sentimento" que expresa o que significa poñer o traxe de Pantalla, tamén destaca a boa colocación de tódalas datas do Entroido nunha columna vertical, que dado a cantidade de elementos non era doado.

Participaron no concurso máis de vinte carteis que inda se poden ver expostos na Casa de Cultura da vila.

A nosa páxina no Facebook

2012-01-24T08:44:00.001+01:00

Aparte deste blog a partires de agora tamén temos páxina no Facebook para que podandes seguir as nosas actualizacións na famosa rede social. A url personalizada da Asociación cultural A Pantalla é: https://www.facebook.com/apantalla agradecemosvos moito que fagandes click no botón de "me gusta" para que chegue a mais xente a nosa labor.

Os pre domingos: Petardazo, Meco, Mulleres e Batentroido

2012-01-16T13:27:00.002+01:00

Xa estaremos todas e todos bastante impacientes pola pronta chegada da nosa festa máis querida, seguramente estamos pensando ou xa temos na cabeza os disfraces e traxes que vamos a poñer e a planificación de tódolos días incluíndo os sábados e domingos anteriores ao Entroido propiamente dito.

Como sabedes, temos o ciclo do Entroido máis grande do mundo!!! (bueno, o mundo e moi grande e nunca se sabe...) e o Entroido de Xinzo sempre foi: Fareleiro, Oleiro, Corredoiro, Entroido e enterro da Sardiña, pero co paso do tempo fóronse recuperando antigas tradicións e como non, inventando outras novas. Este ano como grán novidade o noso Concello anuncia os pre domingos, algo que xa vimos celebrando, aínda que de forma non tan oficial dende fai uns cantos anos.

O sábado anterior ao Fareleiro ao igual que o ano pasado e dende a Praza de Carlos Casares onde está situada a conta atrás para o Entroido, teremos o Petardazo. Alí estará máis dun dando o pistoletazo de saída, o ano pasado recordo que había uns cantos centos de persoas acompañados de Xituma Batuke e descorchando botellas de cava como nota simpática.

Como novidade moi importante para o nosa tradición é que o sábado anterior ao Oleiro, que ata o de agora non había ningun evento entroideiro organizado, dedicamos esa noitiña este ano ao Meco. A procesíon do Meco representa o Entroido máis tradicional por eso convidamos a tódolas persoas e colectivos da vila a que veñades vestidos con roupas tradicionais, rurais, con aperos do campo ou elementos que fagan estrondo, nos como asociación cultural A Pantalla encargarémonos do carro para levar ao individuo, dos fachos e dos persoaxes típicos que saen tódolos anos na procesión. Coma sempre se sairá do Museo Galego do Entroido e chegarase á Praza Maior onde colgaremos oa Meco ben arriba para que pase toda a festa vixiando o noso comportamento.

O seguinte sábado correspondente ao anterior do Corredoiro e como ven sendo habitual dende xa fai bastantes anos será a Noite dedicada ás Mulleres, as asociacións, grupos ou pandillas reuniranse en restaurantes ou nos seus propios baixos preparando abundantes comidas para recibir ao entroido como se merece, eso si recordade que é unha noite fémina, se non eres muller non se che ocorra sair ou xa sabes o que che espera.

A seguinte novedade deste ano é que o sábado propiamente de Entroido se organizase unha gran batucada con profusión de instrumentos de percusión e que lle chaman Batentroido, non hai ata o de agora moita información ao respeto pero xa nos imaxinamos en que consiste.

Amplíase a oferta festeira no Entroido de Xinzo a estes pre domingos, que cada quen escolla o que máis lle convenza e a disfrutalos que so faltan un par de semanas para o Petardazo!

Saudando ao Entroido

2011-03-03T19:37:00.009+01:00

Aínda non chegaron os días grandes de Entroido e as Pantallas, eses demos limiáns, vixiantes e amoladores dos paseantes sen disfraz, elegantes coas súas brancas camisas e calzóns, cos seus relucintes zapatos, coa súa vermella faixa e engalanadas coas súas coloridas capas, tomarón as rúas de Xinzo, anunciando a chegada do Entroido, ao son das súas vexigas e dos seus axóuxeres e campás.

Ao tempo en Verín os Cigarróns garbosos coas súas puntillas seguindo o tintinear das súas chocas tampouco puideron esperar, decidiron saúdar aos seus veciños, aos que ataviados co seu vergallo amonestaron un ano máis, avisándolles que tomarán o poder da vila nos próximos días.

Tampouco as Madamás e os Galáns de Cobres, elegante e minuciosamente ataviados se resistiron a sair as rúas das parroquias de Vilaboa, rendendo culto á beleza e facendo da danza un arte cheo de música e cor.

E en breve os Peliqueiros tomarán as rúas de Laza, os Felos as de Maceda, os Boteiros as de Vilariño de Conso, os Xenerais as de Boqueixón… e as ancestrais tradicións do Entroido Galego estarán presentes nas rúas celebrando o fin dos longos e duros días de inverno, mentres enchemos as nosas mesas de cachuchas e lacóns, de grelos e patacas, de orellas e filloas antes de chegar ao período de abstinencia carnal que suporá a coresma a partir do mércores de cinsa.

En poucos días, a festa pagana que é o Entroido chegará a tódalas vilas de Galicia; anuncianse días de festa na que se poden romper tódalas normas, días nos que os galegos convertiremos o Entroido na festa máis irreverente do noso calendario, días nos que mudaremos o noso rostro e trocaremos a nosa rutina por unha irónica función da que todos participaremos con humor, enxeño e cor, no que cada acontecemento sirve para poñer do revés a monotonía da nosa vida cotiá.

Todas estas tradiccións e manifestacións culturais son merecedoras dunha sede digna, na que ser recollidas e compartidas para que sexa accesible para todos os galegos, é por esto que os Amig@s do Museo Galego do Entroido lle esiximos ás Administracións a implicación necesaría para potenciar e concluir un fermoso e ambicioso proxecto que os poderes públicos decidiron deixar horfo.

(texto de Tino Pozo Rodríguez)

Nace Amig@s do Museo Galego do Entroido

2011-02-01T15:04:00.005+01:00

Nace en Xinzo a plataforma Amigos do Museo Galego do Entroido, un grupo de veciños e veciñas inconformistas e de diferentes colectivos sociais, políticose culturais, que ten como fin o de impulsar e revitalizar o ambicioso proxecto do Museo Galego do Entroido, un espazo onde terá cabida a realidade festiva e antropolóxica de tódolos entroidos de Galicia.

Cartel entroido 2011

2011-01-19T09:41:00.011+01:00

Nesta ocasión presentáronse ao concurso para a realización do cartel do Entroido de Xinzo de Limia do ano 2011 mais de trinta propostas, todas elas ineditas. A data de presentación dos carteis rematou o pasado 15 de xaneiro e pódense ver expostos na casa de Cultura da vila.

A estas alturas xa se sabe cal foi o cartel elexido polo xurado, o realizado por Paula Bañobre de 19 anos e veciña de Xinzo, esta estudante de Comunicación Audiovisual quería facer un cartel no que a gran protagonista fose a Pantalla e que expresara movemento, ruido e o ambiente festivo do Entroido.

Dende a asociación cultural A Pantalla dámoslle a nosa mais sincera noraboa a Paula e agardamos que tódolos anos axa unha grande participación neste concurso que lle dá maior relevancia ao noso Entroido.

Cartel entroido 2010

2010-01-25T11:54:00.003+01:00

Onte comezou o ciclo do Entrodo en Xinzo de Limia co Domingo Fareleiro, tamén xa podemos ver colocado en tódolos escaparates da vila o cartel deste ano 2010. A gañadora deste ano foi Elsa Gómez Vilarino, a cal felicitamos dende este blog. Gustaríanos que a propia Elsa se puxera en contacto para comentarnos cousas do cartel que fixo. E o resto dos visitantes de este blog: que vos parece o cartel?

Acompañamos á Banda a Montrejeau

2009-10-05T19:10:00.008+02:00

Unha representación da Asociación Cultural A Pantalla asistiu, acompañando a Banda de Gaitas de Xinzo, ó 50 Festival Mundial de Folclore de Montrejeau que transcurriu entre os días 13 e 17 de agosto.
Montrejeau é un pobo pequeno situado na rexión do Medio-Pirineo. Ten só uns 2.500 habitantes, aínda que os días do Festival a súa poboación practicamente se duplica debido a grande afluencia de público e debido tamen ós integrantes dos grupos folcloricos que asisten ó Festival, que este ano foron de 10 paises distintos.
As Pantallas dedicaronse a acompañar a Banda de Gaitas nos seus desfiles polo pobo a tardiña e tamén nas actuacións de noite no pabillón cuberto. Só vos podo dicir que ó público, cando sairon as pantallas brincando, batendo as vexigas e facendo o ooooh, quedóuselle unha cara... xa volas imáxinandes.
Moi boa a combinación Banda de Gaitas e Pantallas, espero que podamos facer mais viaxes xuntos.

Entroido 2009

2009-02-17T18:44:00.006+01:00

Xa está eiqui, xa chegou o entroido de Xinzo!!!

Corredoiro 2009

2009-02-10T08:21:00.012+01:00

O ciclo do Entroido continua na Limia, este vindeiro fin de semana é Corredoiro, este ano con moitas novidades importantes. Trasládase ao sabado a procesión e posterior aforcamento do Meco. O percorrido polas rúas do casco vello comezará sobre as 19:00 horas na praza de Oriente, rematando na praza Maior. Todo este tempo o Meco irá acompañado polos membros da Asociación Cultural A Pantalla e tódolos colectivos da vila que desexen participar. Non é preciso decir que todo o mundo ten que vir disfrazado, a ser posible con traxes vellos ou antigos.

Como ven sendo habitual xa dende fai unha chea de anos esta mesma noite do sábado as Feminas terán a súa cea anual de Entroido (que peligro), moito coidadiño os machos que saian esa noite...

O domingo pola mañá están convocadas tódalas Pantallas (que se sintan Pantalla) a unha xuntanza na praza Maior sobre as 12 da mañá. Si lle tes un gran respeto a este traxe acude a xuntanza, cantos mais sexamos mellor. Pola tarde, a eso das 17:30 haberá os “Xogos do Entroido” na praza Maior. Todo este día estará amenizado por duas charangas, Escachapeitos e Apeles, a música e a troula non van faltar, e coma sempre todo o pobo xa sairá disfrazado a rúa como preambulo dos días grandes de Entroido que nos esperan.

Intentaremos actualizar os datos e horarios o longo desta semana.

Oleiro 2009

2009-02-03T08:18:00.004+01:00

Como todos e todas sabemos, despois do Fareleiro ven o... Oleiro. Eiqui xa non fai falla que vaiamos todos protexidos con gafas, monos, gorros, etc... o vindeiro domingo día 8 xa podemos disfrazarnos do que mais nos guste e ir a Praza Maior e o Barrio de Abaixo a ver como os mozos mais valentes se tiran as olas uns a outros. Todos disfrutaremos moito vendo o Xogo das Olas, e esperemos que ninguen se rompa a crisma.

Fareleiro 2009

2009-01-27T19:09:00.003+01:00

Si si si, este domingo día 1 de febreiro comeza o Entroido en Xinzo. Esperemos que o tempo acompañe algo, sinon a mezcla da fariña e auga vainos poñer bonitos...

Xa temos cartel!!!

2009-01-02T10:30:00.008+01:00

O Concello de Xinzo de Limia xá escolleu cartel para o Entroido deste ano 2009.

Despois de estar expostos na Casa da Cultura da vila mais dunha ducia de carteis participantes no concurso, para que os veciños os viran e deran a sua opinion sobre eles, a principios de decembro o Concello de Xinzo fixo a súa elección, que seguramente como tódolos anos non será a gusto de todos (eso é imposible), pero o que é innegable e que o cartel deste ano ten unha grande vistosidade como indicou o Concelleiro de Cultura.

Noraboa ós dous limians gañadores: Pablo Ojea Cerradelo e Joanna Busmail Casanova.

Entroidoooooooooooooooo

2008-02-01T09:58:00.000+01:00

Despois do Fareleiro, Oleiro e Corredoiro, xá está eiqui a máis grande de tódalas festas: O Entroido. Quédanos por diante moitos días de troula, alegria, bo humor, charangas, carrozas, Pantallas (e espantallos por desgracia) e todo o que caracteriza o noso Entroido.

Pasaino o mellor posible respetando os demais, Viva o Entroido de Xinzo!!!

Domingo Corredoiro

2008-01-23T17:39:00.000+01:00

Xa estamos no Corredoiro. E este ano con unha novidade moi importante como é, a primeira gran xuntanza de Pantallas, que como vistes na anterior entrada esta convocada para o domingo sobre as 12 da mañá na praza maior.

Con pouco tempo para descansar, a primeira hora da tarde, sobre as 17:30, o xogo da cucaña tamén na praza. Entorno as 19:00, e como en anteriores anos, celebraráse o percorrido polo casco vello e posterior aforcamento do Meco. Preténdese xuntar o maior número de persoas posible, para elo convidamos a outros colectivos e asociacións da Vila para facer este acto máis maioritario. Non é preciso decir que todo o mundo ten que vir disfrazado, a ser posible con capuchóns clásicos ou traxes dos anos 20 e 30.

Tódolos actos deste día estarán amenizados por varias charangas, a música alegre non vai faltar.

Viva o Entroido de Xinzo!!!

Concentración de Pantallas

2008-01-21T12:54:00.000+01:00

Este domingo que ven (Corredoiro) a Asociación Cultural A Pantalla organiza a primeira gran concentración de Pantallas. Si te sintes Pantalla e lle tes un gran respeto a este traxe acude a xuntanza xa que vai ser un momento histórico.

A xuntanza terá lugar o domingo 27 ás 12 da mañá na Praza Maior.
Pinchando no título pódese ver o cartel que anuncia o evento.

Domingo Oleiro

2008-01-14T18:56:00.001+01:00

Unha semana despois do Domingo Fareleiro ven o? ... Oleiro, ben, xa vexo que o sabedes todos moi ben, ainda que eu en Compostela teño que contestar tódolos anos ás mesmas cuestións: "este domingo que toca, lo de la harina o lo de las hormigas?" en fin...

Esperemos que nos acompañe máis o tempo que o domingo pasado, polo menos que non chova, aínda que como di "xe" no chat: a climatoloxía non pode con nos. Alí estaremos na praza coma tódolos anos as cinco da tarde esperando a que chegue o burro do gitano cargadiño de olas de Niñodaguia.

Alí nos veremos, Viva o Entroido de Xinzo!!!

Xornadas de Entroido

2008-01-14T12:12:00.000+01:00

A Asociación Cultural A Pantalla organiza as "Xornadas de Entroido 2008" en Xinzo de Limia.

Estas xornadas consistirán nunha charla-coloquio na que intervirán: Federíco Cocho, Alfonso Villarino e Miro Martínez. Cada un deles dará unha pequena conferencia o final das cales haberá un momento de coloquio no que todolos participantes e asistentes á conferencia poderán reflexar as súas opinións ou dúbidas.

Paralelamente á conferencia, inaugurarase a exposición "A Maxia do Entroido". Unha exposición fotográfica de gran formato que expresan o sentimento máxico do que significa levar posto o traxe de Pantalla.

Ámbolos dous acontecementos terán lugar na Casa da Cultura de Xinzo de Limia o día 18 de xaneiro ás 20:00 horas. Pinchando no título pódese ver o cartel completo.

Domingo Fareleiro

2008-01-07T19:15:00.000+01:00

O Entroido da comezo en Xinzo de Limia, este domingo día 13 é xa Fareleiro. Celébrase xustamente un mes antes da festa grande. Como xa sabedes, consiste nunha auténtica batalla campal na que a única arma utilizable son os farelos ou a fariña.

Para que vaiades entrando en ambiente dirémosvos que o pasado domingo Fareleiro lanzáronse miles de kilos de farelos. Todo o mundo acabará pringado ata a cabeza como todolos anos.

Un consello: no vaias moi elegante e disfruta da festa. Viva o Entroido de Xinzo!!!

Xa temos cartel !!!

2007-12-12T09:51:00.000+01:00

Xa está posto por Xinzo o Cartel do Entroido 2008, wow!!!

É un cartel chamativo, de eso non hai dúbida. Como sempre a unhos lles gustara e a otros non, pero o máis importante e que sexa un cartel que represente ben o noso Entroido, tanto en Xinzo, coma no resto de Galicia.

Deixade eiqui as vosas opinións, seran ben recibidas.

Cómo se viste unha pantalla

2007-12-11T13:41:00.001+01:00

Entroido ou Antroido

2007-11-30T20:08:00.000+01:00

Unha persoa anónima no chat fixo o comentario de si se dí Entroido ou Antroido. En Xinzo de Limia, como todos sabedes dícese Entroido, en Ourense tamén, en Verín o mesmo, Sarreaus, Maceda... ; pero si que é verdade que por exemplo en Compostela a xente acostuma a dicir Antroido.

Investigando un pouco dinme conta que no google o poñer Entroido saian miles de entradas, en cambio si poñemos Antroido saen moitas menos e incluso nos recomenda que busquemos por Entroido.

Por outra banda, no Dicionario da Real Academia Galega aparecen as dúas entradas pero só nuha delas nos atopamos cunha definición ben extensa: Entroido- Período de tres días anterior á coresma, durante o que se celebran festas populares con máscaras, bailes, etc (a definición sigue). Aparécenos tamén a entrada Antroido, nela se nos deriva á primeira (entroido) e se nos indica que o uso de Antroido é un vulgarismo ou dialectalismo e recoméndase o uso da palabra Entroido.

Resumindo: no dicionario saen as dúas palabras ainda que se recomenda o uso de Entroido.

E cal é o mellor Entroido do mundo? eso xa o sabedes todos, non merece a pena contestar...

Cartel Entroido Xinzo de Limia

2007-11-21T08:24:00.000+01:00

Este foi o cartel que serviu para anunciar o Entroido de Xinzo de Limia por toda Galicia no ano 2000. Foi un cartel do que se falou moito e que gustou a practicamente todo o mundo no pobo. Decíase que a fotografía da Pantalla representaba moi ben o espiritu do Entroido de Xinzo.

Sabemos que nestas datas estarase a decidir o que será o cartel do Entroido de Xinzo de Limia do ano 2008, esperamos que sexa unha boa elección e que así contribua a que nos sintamos máis orgullosos no noso Entroido.

Asociación Cultural A Pantalla

2007-11-19T20:00:00.000+01:00

A asociación cultural “A Pantalla” nace en Xinzo de Limia no Entroido do ano 1996, tendo como finalidade a promoción, difusión, protección e formación do noso símbolo de identidade cultural máis significativo “A Pantalla”.

Os nosos obxectivos principais son os seguintes:

- Ofrecer a todos os veciños un local no que teñan cabida todas as actividades propias e enriquecedoras do Entroido.

- Que todos os elementos culturais “vivos” poidan ser recollidos e catalogados dentro duna visión científica e etnográfica.

- Trasmitir e fomentar o significado profundo que ten o noso Entroido, e percurar que a xente saiba respetar o papel da Pantalla e a súa enorme trascendencia cultural.

- Rescatar a memoria histórica relacionada co Entroido mediante a recuperación de tradicións perdidas ou esquecidas tanto orais como escritas.

- Recuperación de elementos propios da “Pantalla” que polo paso do tempo foron quedando en desuso, así como diferentes patróns de capas, polís, cintos, percalinas, faixas, ...

Entendemos que este labor é moi necesario e urxente, porque a masificación que ven sofrindo o Entroido de Xinzo nas últimas décadas, fai que valores predominantes que dende sempre definiron o comportamento da máscara se foran desvirtuando.
Para conquerir estes obxectivos temos programadas as seguintes actividades:

- Campañas informativas, con material didáctico para dar a coñecer tanto o comportamento como os elementos que conforman a máscara.

- Elaboración dun arquivo con todos os elementos e materiais relacionados directamente co entroido.

- Realización de obradoiros para a confección da careta e a súa vestimenta.

- Exposicións monográficas sobre o entroido de Xinzo.

- Elaboración dun video, que serva de medio didáctico para dar a coñecer o significado profundo e os valores culturais da Pantalla.

- Confección dun libro que recolla a memoria histórica, así como material fotográfico, testimonios orais, escritos e vivencias do noso Entroido coa colaboración de estudiosos e persoas de máis idade.

- Continuar a colaboración entusiasta cos responsables técnicos do Museo Galego do Entroido”.

Por todo isto , tanto os membros da asociación como moitos veciños estamos dispostos a traballar desinteresadamente, para tratar de conquerir todos estes obxectivos.

¡colabora con nós!

Datas Entroido 2008

2007-10-03T09:31:00.000+02:00

Parace que cada ano o Entroido se achega máis ó Nadal, este ano xa é esaxerada a cousa. Como sabedes o Entroido de Xinzo de Limia ten o ciclo máis longo de toda España, xa que comprende cinco fins de semana. este ano as datas son estas:

Fareleiro: 13 de xaneiro
Oleiro: 20 de xaneiro
Corredoiro: 27 de xaneiro
Entroido: 2, 3, 4 e 5 de febreiro
Piñata: 10 febreiro