lunes, 12 de enero de 2015

Entrevista coa gañadora do cartaz do Entroido 2015

Parece que nos derradeiros anos as rapazas están dando no cravo no que respecta a captar a atención do xurado do cartel do Entroido de Xinzo de Limia, este ano a agraciada foi Katharina Ojea a cal nos adicou un tempiño para contestar ás nosas preguntas sobre ela mesma e sobre o cartel deste Entroido.






































Quén é Katharina? tes alguna relación con Xinzo?
Boas, pois chámóme Katharina Ojea Cid, teño 19 anos e nacín en Celanova, aínda que actualmente atópome estudiando en Salamanca. Índa que propiamente non son de Xinzo, paso bastante tempo na localidade, xa que é donde se atopa unha gran parte do meu círculo de amizades e foron eles e elas quen me animaron a participar no concurso. Tamén, por outra banda, meu pai é nado dun dos pobos que se atopan preto de Xinzo e dende pequena foi el quen me inculcou aprecio polo Entroido da Limia.

Fálanos un pouco de ti profesionalmente; cal é a túa formación, que estudiaches, a que te adicas, tes feito mais carteis para concursos ou algún encargo?
Actualmente estou cursando 3° de Belas Artes na Universidade de Salamanca. No meu tempo libre adícome a facer algún que outro debuxo e retrato como encargo para os meus coñecidos, porque sei que é unha maneira de poder darme a coñecer profesionalmente e seguir mellorando neste eido.
No referente aos concursos de carteis, aínda non participara en ningún, porque actualmente a maioría destes son realizados en formato dixital e tamén debido ao traballo e tempo que conleva buscar unha idea que guste e polas horas que require realizalo.
Cando me mencionaron que este ano no concurso para realizar o cartel do Entroido só se podían empregar técnicas tradicionais, sentinme, se se pode chamar así, “realizada”, porque vexo que aínda existe xente que valora a nosa profesión, a miña profesión o día de mañá. Un dos meus obxetivos é a de facer ver a importancia do debuxo, da pintura e da escultura entre outras, na educación. Qué podemos esperar de futuros e futuras persoas que crezan nesta sociedade sen darlle a oportunidade de fomentar e acrecentar a súa imaxinación e creatividade? Para min, é un pilar fundamental para educar aos futuros/as cidadáns e cidadás.

Que significa para ti anunciar coa túa obra o Entroido de Xinzo?
Para min é moito máis que un simple debuxo, é un orgullo, como o sería para calquera persoa, e máis para alguén que intenta pertencer ao mundo do arte. Pero máis aínda sabendo o que significa para as persoas limiás o Entroido. O importante que é para eles e elas e como o sinten dende que son cativas/os.

En que consiste á idea que resultou vencedora este ano, que cres que foi o que convenceu ao xurado para seleccionar a túa proposta e non outra das presentadas?
A idea era a de representar as cores do Entroido e a alegría coa que se vive. Tamén dando a ver un pouco algunhas das cousas que, entre outras, o caracterizan e o fan único, como son: o Oleiro; o colgamento do Meco; as Pantallas, neste caso levando a un veciño que ía sen disfrazar; e a trompeta, en representación da música das charangas, que animan as rúas do pobo durante estas datas.
O que vin diferente no meu cartel con respecto aos outros ou outras participantes foi a idea de integrar as fechas coma un debuxo máis e que ocupasen unha parte importante do cartel. Polo demáis, na miña opinión, os outros carteis presentados tiñan ideas moi orixinais e traballadas, igual de merecedoras de gañar.

Que técnica empregaches e canto che levou aproximadamente?
Empreguei acuarelas e lápices de cores. Levoume máis ou menos uns 5 días realizalo, aínda que non lle adiquei todas as horas que me gustaría pola falta de tempo libre.

Que sentes cando vexas o teu cartaz pegado por tódolos rincóns da vila?
Un gran orgullo, por darme a oportunidade de que o meu debuxo fose o elexido para que represente o Entroido, e que en maior ou menor parte, sexa algo que lles transmita esa alegría coa que viven a chegada desas datas que todo o ano levan esperando con moitas ganas.
É unha oportunidade de ouro, poder ver que nun cartel reside parte da cultura dunha localidade coma Xinzo. Poder representar isto, dálle sentido a por que persoas coma min se adican a isto, a intentar plasmar nunha folla cores, sentimentos e emocións.

Como vas pasar este Entroido 2015, vestiraste de Pantalla?
Non creo, gústame máis vivilo dende fora, vendo como as persoas que vistaen o traxe de Pantalla o sinten de verdade. Considero que é algo que se debe sentir, como xa dixen, e por iso en parte está máis reservado á poboación limiá, que o vive con máis intensidade e sentimento, e non empregalo como un disfraz máis.

Katharina ten unha páxina de Facebook onde amosa algúns dos seus últimos traballos feitos para clase ou ben por ocio cando tén algo de tempo libre, botádelle un vistazo, non se lle dá mal o debuxo.

lunes, 27 de enero de 2014

Cartaz do Entroido Xinzo 2014

O Entroido 2014 da o seu pistoletazo de saída coa elección do cartaz.

Este ano da ducia de carteis presentados, o xurado decidiu que o mellor foi o de Laila Gómez Pan, unha coruñesa residente en Allariz. Laila é enxeñeira inda que coma ela conta: "a miña verdadeira paixón é a fotografía, sobre todo a de retrato, a tráve dos que intento conectar coa xente que saco" e seguramente esto foi o que fixo que a súa proposta conectase co xurado e resultase elexida xa que a imaxe da Pantalla percorrendo a rúa mollada resulta moi impactante.

"pareceume coma o espíritu do Entroido de Xinzo"

A fotografía do cartaz fixoa a propia autora o ano pasado cando un amigo dela viña trotando pola Rúa dos Viños, ela deuse conta enseguida do reflexo da figura da pantalla nos charcos de auga e realizou a instantanea sen dudalo.

Podendes coñecer máis do traballo de Laila na súa web ou tamén na súa páxina de Flickr onde ten fotografías espectaculares.


viernes, 25 de enero de 2013

Xinzo de Limia, máis dun mes de Entroido!!!


Sábado do Petardazo 19 de xaneiro
Dende a Praza de Carlos Casares e no momento en que a conta atrás chegue a 0 días, 0 horas, 0 minutos darase o petardazo de saída a este Entroido 2013, As charangas Trompafos e Achicoria e os grupos de batucada Xituma e Batulethes todos de Xinzo, serán os encargados de facernos entrar en calor e recibir como se merece este Entroido 2013.

Domingo Fareleiro 20 de xaneiro
A fariña é a protagonista deste día, xa dende a mañanciña pola praza maior se verán os primeiros individuos tirando fariña pero será a tarde a eso das 5 cando a grán batalla se produza, saíde ben protexidos (ou non) e dispostos a que vos enchan de fariña dende a cabeza aos pés, a as risas están aseguradas.

Procesión do Meco 26 de xaneiro
Dende o Barrio de Abaixo e cando empeze a escurecer, comezará a procesión do Meco, este importante persoaxe irá acompañado por toda a Rúa dos Viños con fachucos de palla e unha gran comitiva con tódolos elementos habituais destes derradeiros anos: carro cos bois, touro, choqueiros, máscaras, cura, gaiteiros, aperos de labranza, gandeiros... todolos participantes na procesión deberán ir con vestimenta tradicional. Organizado pola Asociación a Pantalla e Aimil Folc, este ano tamén participará o folión "A Cañiceira" de Trives.

Domingo Oleiro 27 de xaneiro
A eso das 5 da tarde os mozos e ultimamante algunha valente moza do pobo, fan un gran círculo na Praza Maior e comeza o xogo das Olas, pásanse as olas de barro de Niñodaguia de uns a outros e ó que lle caia ó chan estará obrigado a invitar a unha ronda de viños ó resto de compañeiros. Despois da praza, os xogadores desplazanse ata o Barrio de Abaixo onde se repite o xogo e tómanse os viños de rigor.

Noite das Mulleres 2 de febreiro
Dende xa fai bastantes anos as asociacións, grupos e pandillas de mulleres reúnense en restaurantes ou nos seus propios baixos celebrando divertidas ceas. Recordade que é unha noite fémina, se non eres muller non se che ocorra sair ou xa sabes o que che espera.

Domingo Corredoiro 3 de febreiro
Este é o primeiro día no que saen as auténticas protagonistas do Entroido de Xinzo, as Pantallas, ás cales lles encanta bailar, troulear, brincar e sufaldrear polas rúas do casco vello e Praza Maior. A música e a troula non van faltar este domingo e coma sempre todo o pobo xa sairá disfrazado a rúa como preambulo dos días grandes de Entroido que nos esperan.

Entroido 8, 9, 10, 11 e 12 de febreiro
Xa están aquí os cinco días grandes de Entroido de Xinzo. Dende o venres ata o mártes o ambiente nas rúas do pobo será inigualable e estará amenizado por charangas ben coñecidas como Trompafós, Xituma, AchicoriaDGT, Apeles, TNT, e algunha nova este ano como Mekánica, Artistas del Gremio, Nova Trives, Madialeva, tamén sairán as Bandas de Gaitas de Xinzo A e B. Un dos pratos fortes destes días centrais será o grán desfile do martes no que participarán non só veciños da propia vila senon xentes chegadas de todolos pobos de arredor e incluso do país veciño..

Enterro da Sardiña 13 de febreiro
O mércores de Cinsa, a eso das 8 da noitiña darase o Sermón do entroido coa asistencia dos altos cargos municipais, posteriormense e con gran pena de tódolos presentes queimarase a Sardiña no centro da Praza.

Domingo de Piñata 17 de febreiro
Despois dos Fareleiro, Oleiro, Corredoiro, Entroido... en Xinzo inda nos quedan gañas de volver sair disfrazados. Inda que hoxe os protagonistas serán os mais pequenos que poderán desfrutar de xogos e competicións entre eles. Tamén seguramente se deixarán ver as derradeiras Pantallas brincando polo Barrio de Abaixo. Como ven sendo habitual estes anos, haberá unha orquesta na praza de Carlos Casares, este ano tócalle á Olympus.

E con este domingo de Piñata, Xinzo de Limia pecha este ciclo de Entroido de cinco fíns de semana, esperamos que todas e todos o pasedes moi ben e que ninguen se manque, o importante é desfrutar dos amigos e familia e vivir ao cento por cento tódolos días.


Unha cousa máis; moto respeto polo traxe de Pantalla, se non estas dispost@ a cumprir unhas pequenas normas non poñas a Pantalla, seguro que o pasas incluso mellor con outros disfraces, a Pantalla non bate coas vexigas na xente, non rompe botellas ou vasos na rúa, non anda tambaleandose e coa cara descuberta, non pide cartos, non molesta a forasteiros... unha Pantalla ten "respeto e sentimento"

martes, 22 de enero de 2013

Procesión do Meco




































Este sábado 26 celebraremos como xa é tradicional a Procesión do Meco. Cando comeze a escurecer sairase do Barrio de Abaixo e recorrerase toda a Rúa dos Viños ata a Praza Maior onde finalmente o colgaremos no pau onde permanecerá vixiando todo o Entroido. Este importante persoaxe irá acompañado con fachucos de palla e unha gran comitiva con tódolos elementos habituais destes derradeiros anos: carro cos bois, touro, choqueiros, máscaras, cura, gaiteiros, aperos de labranza, gandeiros... todolos participantes na procesión deberán ir con vestimenta tradicional. Organizado pola Asociación a Pantalla e Aimil Folc, este ano tamén participará o folión "A Cañiceira" de Trives.

viernes, 11 de enero de 2013

Entrevista con Gory, o gañador do cartaz do Entroido 2013








































José Manuel Formoso, mais coñecido como Gory, gañador do concurso do cartel deste Entroido 2013 concedeunos unha entrevista (en exclusiva).



Fálanos un pouco de ti, onde te formaches, eres profesional do mundo do deseño ou aficionado a facer carteis?
Hoxe mesmo cumplo os 30 anos e xa levo 8 anos traballando coma deseñador gráfico. Cursei os meus estudos na “Escola de Arte Antonio Failde”, na mesma cidade na que hoxe resido, Ourense.  Xusto ó rematar tiven a sorte de atopar traballo coma deseñador nun estudo. Dende alquel día adícome a este mundo profesionalmente ainda que para min non se trata dun traballo, é algo vocacional.


Que significa para un artista de Xinzo anunciar coa súa obra estas festas?
Obter un primeiro premio en calquera concurso é unha satisfación moi grande, xa que se está valorando un traballo que ti fixeches e recoñecese o teu esforzo. Pero que sexa o cartaz do noso Entroido e unha sensación distinta, sabes que son as datas máis importantes de Xinzo é cando a xente mais se implica na vila, por ese motivo e unha grande ledicia representar algo tan importante para nos.


¿En que consiste á idea que resultou vencedora este ano, que cres que foi o que convenceu ao xurado para seleccionar a túa proposta e non outra das 20 presentadas?
Queria facer un carta que reivindicase o comportamento dunha Pantalla. A Pantalla non so leva a un veciño de xinzo a unha tasca da vila, coma moita xente pensa, ten un papel moito máis importante. Unha PANTALLA pon orde no Entroido, corre, brinca, troulea, sufaldrea acosando as mulleres coas suas vexigas. Esto foi o que quixen representar no cartaz, ao meu modo de ver unha maneira máis de concienciar a xente sobre a importancia de levar ben o noso traxe. Eu penso que foi esto o que valorou o xurado á hora de escoller o meu cartaz.


Como profesional do deseño, que opinas de que se fagan concursos abertos a todo tipo de público, idades, profesionais ou non, ou eres da idea de que deberían ser concursos máis pechados.
Na miña opinión non esta mal que se fagan este tipo de concursos, unha boa idea pódeselle ocorrer a calquera sen necesidade de se adicar a este mundo profesionalmente, e se é capaz de plásmalo nun cartaz non vexo que sexa impedimento para se poder presentar. O que creo que e importante e ter un xurado que sexa entendido na materia.


Que sentes cando ves o teu cartaz pegado por tódolos rincóns da vila?
O Entroido é unha data moi importante para min, e que o meu cartaz apareza en todolos locais da vila representando estas festas e algo que me agrada moitísimo.


Preséntaste a mais concursos de carteis noutras localidades, fuches agraciado nalgún outro concurso últimamente?
Por motivos de traballo non acostumo presentarme a moitos. Creo que facer un deseño conleva un traballo de búsqueda de información, como pode ser historia da vila, da festa... esto require un tempo, e por desgracia non dispoño de moito. Non e o caso do noso cartaz, o ser veciño de Xinzo e vivir a festa dende rapaz axuda moito.


Como vas pasar este Entroido 2013, vestiraste de Pantalla, que significa para ti levar o traxe de Pantalla?
Como bo Entroideiro estarei metido na festa todolos días, dende o Petardazo ata Piñata se ainda teño forzas. Por sorte levo 27 anos vestindo o Traxe de Pantalla e non teño dúbida de que este Entroido serán 28. Vestir a Pantalla é algo difícil de explicar… orgullo, emoción, forza, respeto admiración…  é simplemente Un Sentimento.


"a Pantalla corre, brinca, troulea, sufaldrea,
acosando as mulleres coas suas vexigas"

lunes, 6 de febrero de 2012

Domingo Corredoiro

Chega xa o grán día onde sairán por primeira vez as Pantallas, O Domingo Corredoiro. Deixámosvos este poema escrito por José Manuel Pérez Rodríguez (Sema) titulado "O Sentir da Pantalla"

Chega o intre soñado
despois dun ano esperando,
volver a sentir na pel
o traxe desexado.

A rúa está murmurando
o canto das vexigas,
e as túas campás bailando
coa alma enchida.

Comezas polo pantalón
e sentes a calor do liño na pel,
o tempo que pensas
que sería o traxe sen el.

Pos a camisa
agarimas os botóns,
oes as rúas que esperan,
canta o teu corazón.

Calzas os zapatos
para levala ben elegante,
que se aparten todos!
e no desfile a deixen diante.

E chega o intre da faixa
que suxeitas tan forte coma o sentir
da alma namorada da festa
que do corpo busca fuxir.

Descolgas a capa entón
e as cintas comezan a brincar,
séntela enriba túa
e pensas en voar.

Ollas para o espello
e xa a ves debuxada
non hai nada máis fermoso
que a marabillosa Pantalla.

Falan as campás do cinto
por ti están a chamar,
endexamais vas esquecer
o seu belo cantar.

Música que sempre acompaña
o doce danzar,
as cintas, un arco da vella
que enche de notas o ar.

Pos as polainas
o ritmo das campás incesantes,
ollas como contestan os cascabeis
igual, igual de elegantes.

E atas o pano,
non menos importante,
mentres miras a pantalla
que berra: avante!

Pois só falta ela, a xefa,
o máis destacado,
só con sentila na man
xa quedas encantado.

Si, e ela, a pantalla
a alma da festa,
o arraigo dun pobo
que no vestir se manifesta.

Comezas a bater as buxigas
cun xesto incesante,
mentres ves aos raparigos
de ollar rutilante.

Non, non están asustados.

Quedan namorados
igual que quedaches ti
a primeira vez
que a viches danzando…

jueves, 26 de enero de 2012

Procesión e Colgamento do Meco

O próximo día 4 de febreiro, e seguindo ca nosa teima do entroido máis tradicional, celebraremos a Procesión do Meco.

Vinde todos con vestimenta tradicional, roupa vella, rural, aperos de labranza, etc... Todo o demais pómolo nós (fachucos de palla, chocas, touro, meco, carro, mascaras, etc...
Sairemos dende o Museo Galego do Entroido a eso das... entre lusco e fusco. Ao final remataremos como sempre coa cea de confraternidade a cual estades todos convidados.

VEN E PARTICIPA NON DEIXES QUE SE ESQUEZA O NOSO ENTROIDO TRADICIONAL.

Por outra banda e xa que non existe en internet un lugar onde aparezan as datas oficiais do Entroido e incluso a páxina do concello de Xinzo de Limia segue en construcción...
Informamos dende o noso blog da asociación cultural a pantalla destas datas:

Sábado do Petardazo 28 de xaneiro
Domingo Fareleiro 29 de xaneiro
Colgamento do Meco 4 de febreiro
Domingo Oleiro 5 de febreiro
Noite das Mulleres 11 de febreiro
Domingo Corredoiro 12 de febreiro
Entroido 17, 18, 19, 20 e 21 de febreiro
Enterro da Sardiña 22 de febreiro
Domingo de Piñata 22 de febreiro

miércoles, 25 de enero de 2012

O cartel do Entroido 2012

Xa se escolleu o cartel que representará ao Entroido de Xinzo de Limia neste ano 2012, parabens ao gañador do concurso José Manuel Formoso Gómez. O cartel destaca polo seus tonos ocres e o slogan "un sentimento" que expresa o que significa poñer o traxe de Pantalla, tamén destaca a boa colocación de tódalas datas do Entroido nunha columna vertical, que dado a cantidade de elementos non era doado.

Participaron no concurso máis de vinte carteis que inda se poden ver expostos na Casa de Cultura da vila.



martes, 24 de enero de 2012

A nosa páxina no Facebook

Aparte deste blog a partires de agora tamén temos páxina no Facebook para que podandes seguir as nosas actualizacións na famosa rede social. A url personalizada da Asociación cultural A Pantalla é: https://www.facebook.com/apantalla agradecemosvos moito que fagandes click no botón de "me gusta" para que chegue a mais xente a nosa labor.


lunes, 16 de enero de 2012

Os pre domingos: Petardazo, Meco, Mulleres e Batentroido

Xa estaremos todas e todos bastante impacientes pola pronta chegada da nosa festa máis querida, seguramente estamos pensando ou xa temos na cabeza os disfraces e traxes que vamos a poñer e a planificación de tódolos días incluíndo os sábados e domingos anteriores ao Entroido propiamente dito.

Como sabedes, temos o ciclo do Entroido máis grande do mundo!!! (bueno, o mundo e moi grande e nunca se sabe...) e o Entroido de Xinzo sempre foi: Fareleiro, Oleiro, Corredoiro, Entroido e enterro da Sardiña, pero co paso do tempo fóronse recuperando antigas tradicións e como non, inventando outras novas. Este ano como grán novidade o noso Concello anuncia os pre domingos, algo que xa vimos celebrando, aínda que de forma non tan oficial dende fai uns cantos anos.

O sábado anterior ao Fareleiro ao igual que o ano pasado e dende a Praza de Carlos Casares onde está situada a conta atrás para o Entroido, teremos o Petardazo. Alí estará máis dun dando o pistoletazo de saída, o ano pasado recordo que había uns cantos centos de persoas acompañados de Xituma Batuke e descorchando botellas de cava como nota simpática.

Como novidade moi importante para o nosa tradición é que o sábado anterior ao Oleiro, que ata o de agora non había ningun evento entroideiro organizado, dedicamos esa noitiña este ano ao Meco. A procesíon do Meco representa o Entroido máis tradicional por eso convidamos a tódolas persoas e colectivos da vila a que veñades vestidos con roupas tradicionais, rurais, con aperos do campo ou elementos que fagan estrondo, nos como asociación cultural A Pantalla encargarémonos do carro para levar ao individuo, dos fachos e dos persoaxes típicos que saen tódolos anos na procesión. Coma sempre se sairá do Museo Galego do Entroido e chegarase á Praza Maior onde colgaremos oa Meco ben arriba para que pase toda a festa vixiando o noso comportamento.

O seguinte sábado correspondente ao anterior do Corredoiro e como ven sendo habitual dende xa fai bastantes anos será a Noite dedicada ás Mulleres, as asociacións, grupos ou pandillas reuniranse en restaurantes ou nos seus propios baixos preparando abundantes comidas para recibir ao entroido como se merece, eso si recordade que é unha noite fémina, se non eres muller non se che ocorra sair ou xa sabes o que che espera.

A seguinte novedade deste ano é que o sábado propiamente de Entroido se organizase unha gran batucada con profusión de instrumentos de percusión e que lle chaman Batentroido, non hai ata o de agora moita información ao respeto pero xa nos imaxinamos en que consiste.

Amplíase a oferta festeira no Entroido de Xinzo a estes pre domingos, que cada quen escolla o que máis lle convenza e a disfrutalos que so faltan un par de semanas para o Petardazo!